യുട്യൂബിൽ തരംഗമായി മോഹൻലാലിന്റെ പുതിയ ചിത്രം ആറാട്ടിന്റെ ട്രയിലർ. റിലീസ് ചെയ്ത് 15 മണിക്കൂർ മാത്രം കഴിഞ്ഞപ്പോൾ 21ലക്ഷം ആളുകളാണ് യുട്യൂബിൽ ട്രയിലർ വീഡിയോ കണ്ടത്. ഫെബ്രുവരി നാലിന് വൈകുന്നേരം അഞ്ചു മണിക്ക് യുട്യൂബിൽ റിലീസ് ചെയ്ത ‘ആറാട്ട്’ ട്രയിലറിന് വൻ സ്വീകരണമായിരുന്നു ആരാധകർ നൽകിയത്. പ്രേക്ഷകർക്ക് ആവേശത്തോടെ കാണാൻ കഴിയുന്ന ഒരു മുഴുനീള എന്റർടയിൻമെന്റ് ചിത്രമായിരിക്കും ആറാട്ട് എന്ന് സംവിധായകൻ ബി ഉണ്ണിക്കൃഷ്ണൻ വ്യക്തമാക്കി. ചിത്രത്തിൽ നെയ്യാറ്റിൻകര ഗോപൻ എന്ന കഥാപാത്രത്തെയാണ് മോഹൻലാൽ അവതരിപ്പിക്കുന്നത്.
ചിത്രത്തിന് യു സർട്ടിഫിക്കറ്റ് ആണ് ലഭിച്ചിരിക്കുന്നത്. തലയുടെ വിളയാട്ടവുമായാണ് ആറാട്ട് ട്രയിലർ. മാസ് ഡയലോഗുകളും ആക്ഷൻ രംഗങ്ങളും നൃത്തരംഗങ്ങളും കൊണ്ട് സമ്പന്നമാണ് ട്രയിലർ. ട്രയിലർ ഇങ്ങനെയാണെങ്കിൽ പടം പൊളിക്കുമെന്നാണ് ആരാധകരുടെ പ്രതികരണം. എ ആർ റഹ്മാനും ട്രയിലറിൽ പ്രത്യക്ഷപ്പെടുന്നു എന്ന പ്രത്യേകതയും ഉണ്ട്. മോഹൻലാലിന്റെ പഴയ ചില മാസ് പടങ്ങളിലെ ഡയലോഗുകളും ഇതിൽ കാണാം.
കോമഡിക്കു പ്രാധാന്യം നല്‍കുന്നതാണെങ്കിലും മികച്ച ആക്ഷന്‍ രംഗങ്ങളും ചിത്രത്തിലുണ്ട്. ഉദയകൃഷ്ണയാണ് ചിത്രത്തിന്റെ രചന നിര്‍വഹിച്ചിരിക്കുന്നത്. ശ്രദ്ധ ശ്രീനാഥാണ് നായികയായി എത്തുന്നത്. നെടുമുടി വേണു, സായ്കുമാര്‍, സിദ്ദിഖ്, വിജയരാഘവന്‍, ജോണി ആന്റണി, ഇന്ദ്രന്‍സ്, രാഘവന്‍, നന്ദു, ബിജു പപ്പന്‍, ഷീല, സ്വാസിക, മാളവിക, രചന നാരായണന്‍കുട്ടി തുടങ്ങിയവരാണ് മറ്റു താരങ്ങള്‍. ക്യാമറ – വിജയ് ഉലകനാഥ്, എഡിറ്റര്‍ – സമീര്‍ മുഹമ്മദ്. സംഗീതം – രാഹുല്‍ രാജ്. കലാസംവിധാനം – ജോസഫ് നെല്ലിക്കല്‍. വസ്ത്രാലങ്കാരം – സ്റ്റെഫി സേവ്യര്‍. സജീഷ് മഞ്ചേരിയും ബി ഉണ്ണികൃഷ്ണനും ചേർന്നാണ് പടം നിർമ്മിച്ചിരിക്കുന്നത്.
