‘നവലിബറല് കാലഘട്ടത്തിലെ മലയാള കച്ചവട സിനിമയുടെ പ്രത്യയശാസ്ത്രം’ എന്ന വിഷയത്തില് കേരള സര്വകലാശാലയില് നിന്നും ഡോക്ടറേറ്റ് നേടി യുവജന കമ്മിഷന് അധ്യക്ഷ ചിന്താ ജെറോം. ഇംഗ്ലീഷ് സാഹിത്യത്തിലാണ് ചിന്തയ്ക്ക് ഡോക്ടറേറ്റ് ലഭിച്ചത്. യുജിസിയുടെ ജൂനിയര് റിസേര്ച്ച് ഫെലോഷിപ്പോടുകൂടിയാണ് (ജെ.ആര്.എഫ്) ചിന്താ ജെറോം ഗവേഷണം നടത്തിയിരുന്നത്.
കൊല്ലം ഫാത്തിമ മാതാ നാഷണല് കോളേജില് നിന്ന് ഇംഗ്ലീഷ് സാഹിത്യത്തില് ബിരുദവും ബിരുദാനന്തര ബിരുദവും കൊല്ലം കര്മ്മല റാണി ട്രെയിനിംഗ് കോളേജില് നിന്നും ബി.എഡ്ഡും പൂര്ത്തിയാക്കിയ ശേഷമാണ് ഗവേഷണം ആരംഭിച്ചത്.കേരള സര്വ്വകലാശാല പ്രൊ വൈസ് ചാന്സ്ലര് ഡോ. പി.പി. അജയകുമാറിന്റെ മേല്നോട്ടത്തിലാണ് ഗവേഷണം പൂര്ത്തിയാക്കിയത്. ‘ചുംബനം, സമരം, ഇടതുപക്ഷം’ , ‘ചങ്കിലെ ചൈന’ ‘അതിശയപ്പത്ത്’ എന്നീ മൂന്ന് കൃതികളും രചിച്ചിട്ടുണ്ട്.
ഡിവൈഎഫ്ഐ കേന്ദ്ര കമ്മിറ്റി അംഗമായ ചിന്ത, കൊല്ലം ചിന്താ ലാന്ഡില് അധ്യാപക ദമ്പതികളായ സി.ജെറോമിന്റെയും എസ്തര് ജെറോമിന്റെയും മകളാണ്. അനീതിക്കെതിരെയും അസമത്വത്തിനെതിരെയും നിലയ്ക്കാത്ത പോരാട്ടം തുടരുന്ന ലോകമെമ്പാടുമുള്ള യുവത്വത്തിനാണു ഗവേഷണപ്രബന്ധം സമര്പ്പിച്ചിരിക്കുന്നതെന്നു ചിന്താ ജെറോം ഫേസ്ബുക്കില് കുറിച്ചു.