ദുൽഖർ സൽമാൻ, സണ്ണി ഡിയോൾ, ശ്രേയ ധന്വന്തരി, പൂജ ഭട്ട് എന്നിവർ പ്രധാനവേഷങ്ങളിൽ എത്തുന്ന ബോളിവുഡ് ത്രില്ലർ ‘ചുപ്’ ഫസ്റ്റ് ലുക്ക് റിലീസ് ചെയ്തു. ചുപ് എന്ന് പേരിട്ടിരിക്കുന്ന ചിത്രത്തിന്റ ടാഗ് ലൈൻ റിവഞ്ച് ഓഫ് ദി ആർട്ടിസ്റ്റ് എന്നാണ്. ആ ബാൽകി ആണ് ചിത്രം സംവിധാനം ചെയ്യുന്നത്. വിഖ്യാത ചലച്ചിത്രകാരൻ ഗുരുദത്തിന്റെ ഓർമദിനത്തിലാണ് ഫസ്റ്റ് ലുക്ക് പുറത്തു വിട്ടത്. ഒരു സൈക്കോളജിക്കൽ ത്രില്ലറായാണ് സിനിമ ഒരുങ്ങുന്നത്.
ലോലമായ ഒരു മനസുള്ള കലാകാരന് വേണ്ടിയുള്ള മംഗളഗാനമാണ് ചുപ് എന്നും ആ പട്ടികയിൽ മുന്നിലാണ് ഗുരുദത്ത് ഉള്ളതെന്നും ബാൽകി മനസു തുറക്കുന്നു. കീ ആൻഡ് കാ, പാഡ് മാൻ, ചീനി കം എന്നീ സിനിമകളുടെ സംവിധായകനാണ് ബാൽകി. ചിത്രത്തിന്റെ തിരക്കഥയും സംഭാഷണവും രാജ സെൻ, റിഷി വിർമാനി എന്നിവർ ചേർന്നാണ്. വിശാൽ സിൻഹയാണ് ഛായാഗ്രഹണം. സംഗീതം അമിത് ത്രിവേദി.
ദുൽഖർ സൽമാൻ ബോളിവുഡിൽ അഭിനയിക്കുന്ന മൂന്നാമത്തെ ചിത്രമാണിത്. കാർവാൻ, സോയ ഫാക്ടർ എന്നീ ചിത്രങ്ങളാണ് ഇതിനു മുമ്പ് ദുൽഖർ ബോളിവുഡിൽ അഭിനയിച്ച മറ്റു ചിത്രങ്ങൾ. സോയ ഫാക്ടറിൽ സോനം കപൂർ ആയിരുന്നു നായിക. കാർവാനിൽ ഒരു പ്രധാനവേഷത്തിൽ ഇർഫാൻ ഖാനും അഭിനയിച്ചിരുന്നു.
