മലയാളികൾ ഒന്നാകെ ആകാംക്ഷയോടെ കാത്തിരിക്കുന്ന വമ്പൻ ചിത്രം. ഒടിയനെ കുറിച്ചുള്ള ഓരോ വാർത്തയും പ്രേക്ഷകരിൽ ആവേശം ജനിപ്പിക്കുമ്പോൾ ഒടിയനായുള്ള കാത്തിരിപ്പുകൾക്ക് കൂടുതൽ കരുത്തേകി ചിത്രത്തിലെ ആദ്യഗാനത്തിന്റെ ലിറിക്കൽ വീഡിയോ റെക്കോർഡുകൾ തീർത്ത് തരംഗമാവുകയാണ്. ‘കൊണ്ടോരാം’ എന്ന സുദീപും ശ്രേയ ഗോഷാലും ചേർന്നാലപിച്ച ഗാനം ചുരുങ്ങിയ സമയം കൊണ്ട് 7 ലക്ഷത്തിലേറെ കാഴ്ചക്കാരുമായി, യൂട്യൂബ് ട്രെൻഡിങ്ങിൽ ഒന്നാമതായി തരംഗമാവുകയാണ്.
ഒടിയൻ മാണിക്യന്റെയും അവൻ ഏറെ സ്നേഹത്തോടെ അമ്പ്രാട്ടി എന്ന് വിളിക്കുന്ന പ്രഭയുടെയും സ്വപ്നങ്ങൾക്കും മോഹങ്ങൾക്കും ഒപ്പം സഞ്ചരിക്കുന്ന ഗാനം തരുന്ന ഫീൽ വേറെയാണ്. എം ജയചന്ദ്രന്റേതാണ് സംഗീതം. ഒടി വിദ്യകളുടെ മായാജാലം തീർത്ത് വി എ ശ്രീകുമാർ മേനോൻ സംവിധാനം നിർവഹിക്കുന്ന ചിത്രം ഡിസംബർ 14ന് തീയറ്ററുകളിൽ എത്താനിരിക്കെ കാത്തിരിപ്പുകൾക്ക് ഉള്ള ആവേശത്തിന് പുതിയൊരു തലം സൃഷ്ടിച്ചിരിക്കുകയാണ് ഈ ഗാനം. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമിക്കുന്ന ചിത്രത്തിൽ മോഹൻലാലിന് പുറമെ മഞ്ജു വാര്യർ, പ്രകാശ് രാജ്, സിദ്ധിഖ്, നരേൻ എന്നിവരും വേഷമിടുന്നു.
