റാഫി മെക്കാര്ട്ടിന് സംവിധാനം ചെയ്ത പഞ്ചാബി ഹൗസിലെ കോമഡി സീനുകളെല്ലാം മലയാളികള്ക്ക് എന്നെന്നും പ്രിയപ്പെട്ടതാണ്. എത്ര കണ്ടാലും മതി വരാത്ത നിരവധി കോമെഡി സീനുകള് ചിത്രത്തിലുണ്ട്. ഗംഗാധരന് മുതലാളിയും രമണനുമാണ് പല കോമെഡി സീനുകളിലും ആരാധകരില് ചിരി പൊട്ടിച്ചത്. ദിലീപാണ് നായകനെങ്കിലും സിനിമയില് സ്കോര് ചെയ്തത് രമണനാണ്. ചിത്രം ഇറങ്ങി വര്ഷങ്ങള് കഴിയുമ്പോഴും രമണനും ചിത്രത്തിലെ കോമെഡി സീനുകള്ക്കും മരണമില്ല. ട്രോളുകളിലും നിറ സാന്നിധ്യമാണ് രമണന്. തന്റെ വീടിനും പഞ്ചാബി ഹൗസ് എന്നാണ് ഹരിശ്രീ അശോകൻ പേരിട്ടിരിക്കുന്നത്.
കൊറോണഭീതിയിൽ ലോകം മുഴുവൻ ലോക്ക് ഡൗണിലേക്ക് പോയപ്പോൾ എല്ലാവരും വീടുകളിൽ അവരെ കൊണ്ട് ചെയ്യാവുന്ന പ്രവർത്തികൾ ചെയ്യുകയാണ്. ലോക്ക് ഡൗണിൽ തന്റെ ‘പഞ്ചാബി ഹൗസി’ൽ ടൈൽസ് ഒട്ടിക്കൽ വിജയകരമായി പൂർത്തീകരിച്ചിരിക്കുകയാണ് നടൻ ഹരിശ്രീ അശോകനും കുടുംബവും. ലോക്ക് ഡൗൺ കാലത്ത് വീടിന്റെ മുകളിലെ നിലയിലെ ടൈൽസ് പൊട്ടിയപ്പോൾ നന്നാക്കുവാൻ ആരെയും ലഭിക്കാത്ത സാഹചര്യത്തിലാണ് കുടുംബസമേതം ഹരിശ്രീ അശോകൻ ടൈൽസ് ഒട്ടിക്കുവാൻ തീരുമാനിച്ചത്. മകനും നടനുമായ അർജുൻ അശോകന്റെ ഭാര്യയുടെ കാലും ടൈൽസ് കൊണ്ട് മുറിഞ്ഞിരുന്നു. കൊച്ചുമകൻ ഓടി നടക്കുന്ന പ്രായം കൂടിയായതിനാൽ ടൈൽസ് ഒട്ടിക്കൽ അത്യാവശ്യമായിരുന്നു.
ഈ ലോക്ക് ഡൗൺ കാലത്ത് ഇതൊരു ചലഞ്ചായി ഏറ്റെടുത്ത ഹരിശ്രീ അശോകനും കുടുംബവും സ്റ്റിക്കർ ഉപയോഗിച്ച് ഒട്ടിച്ചുതുടങ്ങി. ആദ്യം ടൈൽ ഒട്ടിക്കൽ ബുദ്ധിമുട്ടായിരുന്നു. ഒരുവശം ഒട്ടിക്കുമ്പോൾ മറുവശം പൊട്ടി വരും. ആ വെല്ലുവിളികളെല്ലാം തരണം ചെയ്തു ഈ ഉദ്യമത്തിൽ കുടുംബം വിജയിച്ചു.