2011ൽ പുറത്തിറങ്ങിയ വിക്രം നായകനായ ദൈവതിരുമകളിലെ പ്രകടനം പ്രേക്ഷകരെ ഞെട്ടിച്ച സാറ അർജുൻ എന്ന മുംബൈ നിവാസിയെ ആൻ മരിയ കലിപ്പിലാണ് എന്ന ചിത്രത്തിലൂടെ മലയാള സിനിമ ലോകത്തേക്ക് കൊണ്ട് വന്ന സംവിധായകനാണ് മിഥുൻ മാനുവൽ തോമസ്. അന്നേ പ്രേക്ഷകരുടെ മനസ്സിൽ ഇടം പിടിച്ച സാറ ഇന്ന് തന്റെ പതിനഞ്ചാം ജന്മദിനം ആഘോഷിക്കുകയാണ്. ഫേസ്ബുക്കിൽ സാറക്ക് ജന്മദിനാശംസയേകി ഒരു കുറിപ്പും പോസ്റ്റ് ചെയ്തിട്ടുണ്ട്.
ഹാപ്പി ബർത്ഡേ സാറ.. അടിച്ചു പൊളിച്ച് ആഘോഷിക്കൂ.. എന്നെങ്കിലും ഒരിക്കൽ മറ്റൊരു മനോഹര ചിത്രവുമായി നമുക്ക് വീണ്ടും ഒന്നിക്കാം. ആൻ മരിയ പുറത്തിറങ്ങിയിട്ട് നാല് വർഷങ്ങൾ കടന്ന് പോയിയെന്ന് വിശ്വസിക്കാനേ കഴിയുന്നില്ല.
മിഥുൻ മാനുവൽ തോമസും ജോൺ മന്ത്രിക്കലും ചേർന്ന് തിരക്കഥയൊരുക്കിയ ആൻ മരിയ കലിപ്പിലാണ് എന്ന ചിത്രം ആൻ മരിയ എന്ന കൊച്ചു പെൺകുട്ടിയും പൂമ്പാറ്റ ഗിരീഷ് എന്ന യുവാവും തമ്മിലുള്ള മനോഹരമായ ഒരു ബന്ധത്തിലൂന്നിയ ഫീൽ ഗുഡ് ചിത്രമാണ്. പൂമ്പാറ്റ ഗിരീഷായി എത്തിയത് സണ്ണി വെയ്നാണ്. അജു വർഗീസ്, ഷൈൻ ടോം ചാക്കോ, സിദ്ധിഖ് തുടങ്ങിയവർ അഭിനയിച്ചിരിക്കുന്ന ചിത്രത്തിൽ അതിഥി വേഷത്തിൽ ദുൽഖർ സൽമാനും എത്തുന്നുണ്ട്.