മലയാള സിനിമയിലെ ഒഴിച്ചു കൂടാനാകാത്ത താരങ്ങളാണ് മമ്മൂട്ടിയും മോഹന്‍ലാലും. ഇരുവരും ഒന്നിച്ചഭിനയിക്കുന്ന സിനിമകള്‍ ഇന്ന് അപൂര്‍വമാണ്. എന്നാല്‍ വര്‍ഷത്തില്‍ അഞ്ചിലധികം ചിത്രങ്ങളില്‍ മോഹന്‍ലാലും മമ്മൂട്ടിയും ഒന്നിച്ചെത്തിയ കാലമുണ്ടായിരുന്നു. 25 ഓളം സിനിമകളിലാണ് ഇരുവരും ഒന്നിച്ചഭിനയിച്ചത്.
1998 -ല്‍ പുറത്തിറങ്ങിയ ഫാസില്‍ സംവിധാനം ചെയ്ത ഹരികൃഷ്ണന്‍സ്, വലിയൊരു ഇടവേളയ്ക്ക് ശേഷം മോഹന്‍ലാലും മമ്മൂട്ടിയും മുഴുനീള കഥാപാത്രങ്ങളായി മത്സരിച്ചഭിനയിച്ച ചിത്രമായിരുന്നു. ബോളിവുഡ് നടി ജൂഹി ചൗളയായിരുന്നു നായിക. ഇന്നസെന്റ്, നെടുമുടിവേണു, ശ്യാമിലി, കുഞ്ചാക്കോ ബോബന്‍ എന്നിവരും പ്രധാന കഥാപാത്രങ്ങളെ അവതരിപ്പിച്ചിരുന്നു. സിനിമയുടെ ചിത്രീകരണത്തിനിടയില്‍ ഉണ്ടായ രസകരമായ ഒരു അനുഭവം പങ്കുവെക്കുകയാണ് ക്യാമറാമാന്‍ വേണു.
ഒരു ദിവസം വെളുപ്പാന്‍കാലത്ത് മോഹന്‍ലാലിനൊപ്പം ഓരോ കഥകള്‍ പറഞ്ഞു നില്‍ക്കുകയാണ്, പെട്ടെന്ന് ലാല്‍ ഒരു കാഴ്ച തന്നെ ചൂണ്ടിക്കാണിച്ചു. അവിടേക്ക് നോക്കിയ ഞാന്‍ കണ്ടത് മമ്മൂട്ടിയുടെ കൈയ്യും പിടിച്ച് വരുന്ന കുഞ്ഞു ദുല്‍ഖറിനെയാണ്. പെട്ടെന്ന് ‘മോഹന്‍ലാല്‍ കൈ കൊണ്ട് ഒരു സിനിമാഫ്രെയിം ഉണ്ടാക്കി അച്ഛനെയും മകനെയും അതിനുള്ളില്‍ കംപോസ് ചെയ്തിട്ട് എന്നോട് ചോദിച്ചു അണ്ണാച്ചി ‘ലയണ്‍ കിങ്’ സിനിമ കണ്ടായിരുന്നോ’ എന്ന്, ഞാന്‍ കണ്ടിരുന്നുവെന്ന് വേണു പറഞ്ഞു.
‘ലയണ്‍ കിങ്’ എന്ന ഹോളിവുഡ് ചിത്രത്തില്‍ , ഒരു രാത്രി അനന്തമായ ആഫ്രിക്കന്‍ ആകാശത്തെ എണ്ണിയാലൊടുങ്ങാത്ത നക്ഷത്രങ്ങള്‍ക്കുകീഴില്‍ മുഫാസ മകന് ജിവിതത്തിലെ അന്തര്‍ധാരകളുടെ സങ്കീര്‍ണതകള്‍ പറഞ്ഞു കൊടുക്കുന്നു. അച്ഛന്റെ ആ വാക്കുകള്‍ സിംബായുടെ കാഴ്ചപ്പാടുകളെ എങ്ങനെ സ്വാധീനിച്ചു എന്നും, അടുത്ത രാജാവാകാന്‍ എങ്ങനെ സഹായിച്ചു എന്നതുമാണ് കഥയിലെ പ്രധാന ഘടകം. ഇക്കാര്യം ഉദാഹരിച്ചാണ് മോഹന്‍ലാല്‍ മമ്മൂട്ടിയെയും ദുല്‍ഖറിനെയും കുറിച്ച് അന്ന് പറഞ്ഞതെന്നും വേണു പറയുന്നു.
