യുവസംവിധായകർക്ക് ഒപ്പം മോഹൻലാൽ. താരത്തിന്റെ അടുത്ത രണ്ടു ചിത്രങ്ങളും യുവസംവിധായകരായ ആഷിഖ് അബുവിനും ടിനു പാപ്പച്ചനും ഒപ്പമായിരിക്കും. ഇരുവർക്കും മോഹൻലാൽ ഡേറ്റ് നൽകിയതായി റിപ്പോർട്ടുകളുണ്ട്. ഇത് ആദ്യമായിട്ടാണ് ടിനു പാപ്പച്ചന്റെയും ആഷിഖ് അബുവിന്റെയും സംവിധാനത്തിൽ മോഹൻലാൽ അഭിനയിക്കാൻ തയ്യാറെടുക്കുന്നത്. ഈ രണ്ട് ചിത്രങ്ങളും നിർമിക്കുന്നത് ആശിർവാദ് സിനിമാസ് ആയിരിക്കില്ല എന്നും റിപ്പോർട്ടുകളുണ്ട്.
മോഹൻലാൽ ആദ്യമായി സംവിധാനം ചെയ്യുന്ന ‘ബാറോസ്’ ആണ് അണിയറയിൽ ഒരുങ്ങുന്ന താരത്തിന്റെ ഏറ്റവും പുതിയ ചിത്രം. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ തന്നെയാണ് ചിത്രം നിർമിക്കുന്നത്. ലോകത്തിന്റെ വിവിധ ഭാഗങ്ങളിൽ നിന്ന് വാസ്കോ ഡ ഗാമ എത്തിച്ച രത്നങ്ങളുടെയും നിധികളുടെയും അതിന്റെ കാവൽക്കാരനായ ബറോസിന്റെയും കഥയാണ് ചിത്രം പറയുന്നത്.
ഇതിനിടെ പ്രിയദർശൻ സംവിധാനം ചെയ്യുന്ന അടുത്ത ചിത്രം മോഹൻലാൽ ഉപേക്ഷിച്ചുവെന്ന് സൂചനയുണ്ട്. ടിനു പാപ്പച്ചൻ അവസാനമായി സംവിധാനം ചെയ്ത ചിത്രം ആന്റണി വർഗീസ് നായകനായി എത്തിയ ‘അജഗജാന്തരം’ ആണ്. ജയസൂര്യയെ നായകനാക്കി പുതിയ ചിത്രവും ടിനു പാപ്പച്ചൻ പ്രഖ്യാപിച്ചിട്ടുണ്ട്. ആഷിഖ് അബുവിന്റേതായി പുറത്തിറങ്ങാൻ ഇരിക്കുന്ന അവസാനചിത്രം ടോവിനോ തോമസ് നായകനായി എത്തുന്ന നാരദൻ ആണ്. മാർച്ച് മൂന്നിന് ചിത്രം തിയറ്ററുകളിൽ എത്തും.
