ലൂസിഫറിന്റെ തെലുങ്ക് പതിപ്പ് ഗോഡ്ഫാദറിന്റെ ടീസര് പുറത്തിറങ്ങിയതിന് പിന്നാലെ സോഷ്യല് മീഡിയയില് ട്രോള്മഴ. ലൂസിഫറുമായി ചിത്രത്തെ താരതമ്യം ചെയ്യാന് കഴിയില്ലെന്നും ലൂസിഫര് വേറെ ലെവലാണെന്നുമാണ് പലരും അഭിപ്രായപ്പെട്ടിരിക്കുന്നത്. പൃഥ്വിരാജിന്റെ സംവിധായക മികവിനേയും മോഹന്ലാല് എന്ന നടന്റെ സ്വാഗ് ലെവലും ചൂണ്ടിക്കാട്ടിവരുമുണ്ട്. ഗോഡ്ഫാദര് ടീസറിലെ ചില രംഗങ്ങളിലെ എഡിറ്റിംഗ് പിഴവും ഗ്രാഫിക്സ് പോരായ്മകളുമെല്ലാം ട്രോളായിട്ടുണ്ട്.
ലൂസിഫറില് മോഹന്ലാല് അവതരിപ്പിച്ച സ്റ്റീഫന് നെടുമ്പള്ളിയായി ചിരഞ്ജീവിയാണ് എത്തുന്നത്. പൃഥ്വിരാജ് അവതരിപ്പിച്ച കഥാപാത്രമായി എത്തുന്നത് ബോളിവുഡ് താരം സല്മാന് ഖാനാണ്. ചിരഞ്ജീവിയും സല്മാന് ഖാനും ഓപ്പണ് ജീപ്പില് വരുന്ന ഒരു രംഗം ടീസറിലുണ്ട്. ഇതിലെ പിഴവ് ട്രോളായിട്ടുണ്ട്. ‘പിക്സ് ആര്ട്ടില് തല എഡിറ്റ് ചെയ്തുവച്ചാല് ഇതിലും ഒറിജിനാലിറ്റി കാണുമല്ലോ’ എന്നാണ് ട്രോളന്മാര് ചോദിക്കുന്നത്. ഗോഡ്ഫാദര് ടീസര് കണ്ട് കണ്ണു തള്ളുന്ന സ്റ്റീഫന് നെടുമ്പള്ളിയും ട്രോളിലുണ്ട്. മോഹന്ലാലിന്റെ ചിത്രം ആര്ക്കുവേണമെങ്കിലും റീമേക്ക് ചെയ്യാനമെന്നും അന്നാല് ഒരാള്ക്കും മോഹന്ലാലിനെ പോലെ അഭിനയിക്കാന് കഴിയില്ലെന്നുമാണ് ഒരാള് ട്വിറ്ററില് അഭിപ്രായപ്പെട്ടത്. റീപ്ലേസ്മെന്റ് എറര് എന്നാണ് ഇതിനെ ഉപയോക്താവ് ഇതിനെ വിശേഷിപ്പിച്ചത്.
മോഹന്രാജയാണ് ഗോഡ്ഫാദര് സംവിധാനം ചെയ്തിരിക്കുന്നത്. കോനിഡേല പ്രൊഡക്ഷന് കമ്പനിയും സൂപ്പര് ഗുഡ് ഫിലിംസും ചേര്ന്നാണ് ചിത്രം നിര്മിച്ചിരിക്കുന്നത്. മലയാളത്തില് മഞ്ജു വാര്യര് അവതരിപ്പിച്ച കഥാപാത്രം ഗോഡ്ഫാദറില് നയന്താരയാണ് കൈകാര്യം ചെയ്തിക്കുന്നത്. മലയാളത്തില് മഞ്ജു വാര്യരുടെ കഥാപാത്രം സ്റ്റീഫന് നെടുമ്പള്ളിയുടെ സഹോദരിയുടെ സ്ഥാനത്താണെങ്കില് തെലുങ്കില് ചിരഞ്ജീവിയുടെ നായികയായാണ് നയന്താര എത്തുന്നത്. നീരവ് ഷായാണ് ചിത്രത്തിന്റെ ഛായാഗ്രാഹകന്. എസ്. തമനാണ് സംഗീത സംവിധാനം. പ്രഭുദേവയാണ് നൃത്തസംവിധാനം നിര്വഹിച്ചിരിക്കുന്നത്. സുരേഷ് സെല്വരാജാണ് കലാസംവിധായകന്.