കഴിഞ്ഞ കുറേ വർഷങ്ങളായി മലയാള സിനിമയിൽ നിന്നും മാറി നിൽക്കുകയായിരുന്ന നരേൻ ഹല്ലേലുയ്യ, ആദം ജൊവാൻ എന്നീ ചിത്രങ്ങളിലൂടെ തിരിച്ചു വരവ് നടത്തിയിരുന്നു. ലാലേട്ടൻ നായകനായ ഒടിയനിൽ സ്വപ്നതുല്യമായ ഒരു റോളാണ് നരേനെ തേടിയെത്തിയിരിക്കുന്നത്. ചിത്രത്തിനോട് അടുത്ത വൃത്തങ്ങൾ വെളിപ്പെടുത്തിയതനുസരിച്ച് മഞ്ജു വാര്യർ ചെയ്യുന്ന പ്രഭയെന്ന കഥാപാത്രത്തിന്റെ ഭർത്താവായിട്ടാണ് നരേനെത്തുന്നത്. മോഹൻലാൽ, മഞ്ജു വാര്യർ, പ്രകാശ് രാജ് എന്നിവർക്കൊപ്പമാണ് നരേന്റെ ഭൂരിഭാഗം രംഗങ്ങളുമെന്നാണ് അറിയുന്നത്‌. ഇനിയും പേരിട്ടിട്ടില്ലാത്ത തമിഴിലും തെലുങ്കിലുമായി ഒരുങ്ങുന്ന സാമന്ത നായികയായ ചിത്രത്തിലും നരേൻ ഒരു പ്രധാന വേഷം കൈകാര്യം ചെയ്യുന്നുണ്ട്. ഒത്തയ്ക്ക് ഒത്തൈ എന്ന തമിഴ് ചിത്രമാണ് നരേന്റെ റിലീസ് ചെയ്യാനുള്ള അടുത്ത ചിത്രം.
വി എ ശ്രീകുമാർ മേനോൻ സംവിധാനം നിർവഹിക്കുന്ന ഒടിയന്റെ നിർമാണം ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ്. മന്ത്രങ്ങളിലൂടെയും തന്ത്രങ്ങളിലൂടെയും ഇരുളിനെ കൂട്ടുപിടിച്ച് ഭയത്തിന്റെ കണികയുമായെത്തുന്ന ഒടിയനെ കുറിച്ചുള്ള ചിത്രം ചെറുതായിട്ടൊന്നുമല്ല പ്രേക്ഷകരെ ആവേശത്തിൽ നിറച്ചിരിക്കുന്നത്. ചിത്രത്തിന്റെ ഓരോ സ്റ്റിൽസും സോഷ്യൽ മീഡിയയിൽ ചർച്ചയാകുന്നു . ഒടിയന്റെ അവസാന ഷെഡ്യൂൾ ഷൂട്ടിങ്ങ് പാലക്കാടും പരിസരത്തുമായി പുരോഗമിച്ചു കൊണ്ടിരിക്കുകയാണ്. മലയാള സിനിമ ലോകത്തിന് തന്നെ ഒരു മുതൽക്കൂട്ടായി തീരുവാനുതകുന്ന ചിത്രമായിരിക്കും ഒടിയൻ
