സിനിമാപ്രേമികൾ കാത്തിരിക്കുന്ന സിനിമ ‘മരക്കാർ – അറബിക്കടലിന്റെ സിംഹം’ ഡിസംബർ രണ്ടിന് റിലീസ് ആകുകയാണ്. അതേസമയം, ചിത്രത്തിന്റെ തിരക്കഥ ഒരുക്കുന്ന സമയത്ത് നേരിട്ട വെല്ലുവിളികളെക്കുറിച്ച് തുറന്നുപറഞ്ഞ് സംവിധായകൻ പ്രിയദർശൻ രംഗത്തെത്തിയിരിക്കുകയാണ്. മാതൃഭൂമിക്ക് വേണ്ടി എഴുതിയ കുറിപ്പിലാണ് പ്രിയദർശൻ ഇക്കാര്യങ്ങൾ തുറന്നു പറഞ്ഞത്. തിരക്കഥ ഒരുക്കുന്ന സമയത്ത് അറേബ്യൻ ചരിത്രത്തിലും പോർച്ചുഗീസ് ചരിത്രത്തിലും മരക്കാർക്കുള്ള വ്യത്യസ്ത സ്ഥാനങ്ങൾ തനിക്ക് ആശയക്കുഴപ്പമുണ്ടാക്കി എന്നാണ് പ്രിയദർശൻ വ്യക്തമാക്കിയത്.
ചരിത്രം വിശ്വസനീയമായ രീതിയിൽ ചിത്രീകരിക്കുക എന്നതായിരുന്നു സിനിമയിൽ നേരിട്ട പ്രധാന വെല്ലുവിളി. അറേബ്യൻ ചരിത്രത്തിൽ കുഞ്ഞാലി മരക്കാർക്ക് ദൈവത്തിന്റെ സ്ഥാനമാണെന്നും പോർച്ചുഗീസ് ചരിത്രത്തിൽ മരക്കാർ വളരെ വൃത്തികെട്ടവനായ കടൽക്കൊള്ളക്കാരനാണെന്നും മനസിലായി കൂടുതൽ പുസ്തകങ്ങൾ വായിച്ചപ്പോൾ മനസിലായി. ‘വിജയിക്കുന്നവനാണ് ചരിത്രമെഴുതുന്നത്’ എന്നാണ് ചരിത്രത്തെക്കുറിച്ച് എപ്പോഴും പറയുന്നത്. അങ്ങനെ നോക്കുമ്പോൾ തന്നെ അറേബ്യൻ ചരിത്രമാണോ പോർച്ചുഗീസ് ചരിത്രമാണോ ശരിയായ ചരിത്രം എന്ന് അന്വേഷിച്ചു. കുറേ ചരിത്രം വായിച്ചപ്പോൾ കൂടുതൽ ആശയക്കുഴപ്പത്തിലായി. ചരിത്രത്തിൽ മരക്കാരുടെ ജീവിതത്തിലെ ചില സൂചനകൾ മാത്രമാണ് അവശേഷിച്ചിട്ടുള്ളതെന്ന് മനസിലായി. എഴുതി വന്നപ്പോൾ 30 ശതമാനം മാത്രം ചരിത്രവും 60 ശതമാനം ഭാനവയുമായി മരക്കാർ മാറുകയായിരുന്നെന്നും പ്രിയദർശൻ പറഞ്ഞു.
മരക്കാരെ സങ്കൽപിച്ചു തുടങ്ങിയത് അപൂർണവും വിരുദ്ധവുമായ അറിവുകളുടെ കൂമ്പാരത്തിന് നടുവിൽ ഇരുന്നാണ്. സിനിമ കണ്ടിറങ്ങുന്നവരുടെ മനസിൽ കുഞ്ഞാലി മരക്കാർ എന്ന വീരപുരുഷനെ പ്രതിഷ്ഠിക്കാൻ കഴിയണം. അതുകൊണ്ടു തന്നെ ഈ വിധത്തിലല്ലാതെ സിനിമയെടുത്താൽ അത് ഒരു ഡോക്യുമെന്ററി മാത്രമായി മാറുമെന്നും പ്രിയദർശൻ പറഞ്ഞു.
പ്രിയദർശൻ രചിച്ച് സംവിധാനം ചെയ്യുന്ന ചിത്രം ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് നിർമിച്ചിരിക്കുന്നത്. അഞ്ചു ഭാഷകളിൽ ആയി ഒരുക്കിയ ഈ ചിത്രം ഇന്ത്യയിലെ മികച്ച ചിത്രത്തിനുള്ള ദേശീയ പുരസ്‍കാരം ഉൾപ്പെടെ, മൂന്നു ദേശീയ അവാർഡുകളും മൂന്നു സംസ്ഥാന അവാർഡുകളും നേടിയിട്ടുണ്ട്. മോഹന്‍ലാലിനൊപ്പം അര്‍ജുന്‍, സുനില്‍ ഷെട്ടി, മഞ്ജു വാര്യര്‍, കല്യാണി പ്രിയദര്‍ശന്‍, കീര്‍ത്തി സുരേഷ്, പ്രണവ് മോഹൻലാൽ, സുഹാസിനി, പ്രഭു എന്നിവരും മരക്കാറിലുണ്ട്. മൂണ്‍ ഷോട്ട് എന്റര്‍ടെയിന്‍മെന്റിന്റെ ബാനറില്‍ സന്തോഷ് ടി കുരുവിള, കോണ്‍ഫിഡന്റ് ഗ്രൂപ്പിന്റെ ബാനറില്‍ റോയ് സി ജെ എന്നിവരാണ് മരക്കാറിന്റെ സഹനിർമാതാക്കൾ. തിരുനാവുക്കരശ് ആണ് ക്യാമറ.
