മകൻ ആര്യൻ ഖാന് ജാമ്യം ലഭിച്ച സന്തോഷത്തിൽ ബോളിവുഡ് താരം ഷാരുഖ് ഖാൻ. അഭിഭാഷകസംഘത്തിനൊപ്പം ഷാരുഖ് ഖാൻ തന്റെ സന്തോഷം പങ്കുവെച്ചു. മകൻ ആര്യൻ ഖാന് ഹൈക്കോടതി ജാമ്യം അനുവദിച്ചതിനു പിന്നാലെ ട്വിറ്ററിൽ പ്രചരിച്ച ചിത്രങ്ങളിലൊന്ന് ഷാരുഖ് ഖാന്റേത് ആയിരുന്നു. ആര്യൻ ഖാനു വേണ്ടി ഈ ദിവസങ്ങളിൽ പ്രവർത്തിച്ച അഭിഭാഷകർക്ക് ഒപ്പം ഷാരുഖ് ഖാൻ നിൽക്കുന്ന ചിത്രമാണ് ട്വിറ്ററിൽ പങ്കുവെച്ചത്. ചിത്രങ്ങളിൽ അഭിഭാഷകൻ സതീഷ് മനെഷിൻഡെയും അദ്ദേഹത്തിന്റെ ടീമുമാണ് ഉള്ളത്. ഒപ്പം മാനേജർ പൂജ ദദ് ലാനിയെയും കാണാം. മുംബൈ ഹൈക്കോടതിയിൽ ആര്യൻ ഖാനു വേണ്ടി മുതിർന്ന അഭിഭാഷകനായ മുകുൾ റോത്തഗിയും ഹാജരായിരുന്നു.
ഒക്ടോബർ മൂന്നിന് ആയിരുന്നു ആഡംബര കപ്പലിലെ റെയ്ഡിനിടെ 23 വയസുകതാരനായ ആര്യൻ ഖാൻ അറസ്റ്റിലായത്. അറസ്റ്റിനെ തുടർന്ന് മുംബൈയിലെ ആർതർ റോഡിലെ ജയിലിൽ റിമാൻഡിൽ ആയിരുന്നു. രണ്ടു തവണ ആര്യന് കോടതി ജാമ്യം നിഷേധിച്ചിരുന്നു. അതേസമയം, ആര്യനിൽ നിന്ന് മയക്കുമരുന്ന് കണ്ടെത്താൻ എൻ സി ബിക്ക് ആയിട്ടില്ലെന്ന് ജാമ്യാപേക്ഷയിൽ അഭിഭാഷകർ ചൂണ്ടിക്കാട്ടിയിരുന്നു. 21 ദിവസത്തെ ജയിൽ വാസത്തിനു ശേഷം കഴിഞ്ഞദിവസമാണ് ആര്യൻ ഖാന് ജാമ്യം ലഭിച്ചത്.
ആര്യന് ജാമ്യം നൽകുന്നതിനെ എൻസിബി ശക്തമായി എതിർത്തു. ആര്യന് മയക്കുമരുന്ന് ഇടപാട് ഉണ്ടായിരുന്നുവെന്ന് വാദിച്ച എൻ സി ബി വാട്സാപ് ചാറ്റുകൾ ഇതിന് തെളിവാണെന്ന് കോടതിയിൽ വാദിച്ചു. അതേസമയം, 14 കർശന ജാമ്യവ്യവസ്ഥകളോടെയാണ് ആര്യൻ ഖാന് ജാമ്യം അനുവദിച്ചത്. എൻ സി ബി ഓഫീസിൽ എല്ലാ വെള്ളിയാഴ്ചയും ഹാജരാകണം. പാസ്പോർട്ട് കോടതിയിൽ സമർപ്പിക്കണം. മുൻകൂർ അനുമതിയില്ലാതെ രാജ്യം വിടാൻ പാടില്ല. കൂടാതെ, കേസ് സംബന്ധിച്ച് മാധ്യമങ്ങളിൽ അനാവശ്യ പ്രസ്താവനകൾ നടത്താൻ പാടില്ല. മുംബൈ വിട്ട് പുറത്തു പോകേണ്ടി വന്നാൽ അന്വേഷണ ഉദ്യോഗസ്ഥനെ വിവരമറിയിക്കണം. ഇതോടൊപ്പം ഒരു ലക്ഷം രൂപ കെട്ടി വയ്ക്കണം. ഏതെങ്കിലും വ്യവസ്ഥകൾ ലംഘിക്കപ്പെട്ടാൽ ജാമ്യം റദ്ദാക്കാൻ എൻസിബിക്ക് കോടതിയെ സമീപിക്കാം.