ചില ഡയലോഗുകൾക്ക് സാധാരണക്കാരന്റെ ജീവിതത്തിലേക്ക് ഇടിച്ചു കയറാനുള്ള ഒരു മാന്ത്രികശക്തിയുണ്ട്. അത്തരത്തിൽ ഉള്ളൊരു ഡയലോഗാണ് കുമ്പളങ്ങി നൈറ്റ്സിലെ ‘എന്ത് പ്രഹസനമാണ് സജീ’ എന്ന ഷെയ്ൻ നിഗം അവതരിപ്പിക്കുന്ന ബോബി എന്ന കഥാപാത്രം സൗബിൻ ഷാഹിർ അവതരിപ്പിക്കുന്ന സജി എന്ന കഥാപാത്രത്തിനോട് പറയുന്ന ഡയലോഗ്. സീരിയസായിട്ട് പറഞ്ഞ ആ ഡയലോഗ് പ്രേക്ഷകർ കോമഡിയായി ഏറ്റെടുത്ത സന്തോഷത്തിലാണ് ഷെയ്ൻ നിഗം. ടൈംസ് ഓഫ് ഇന്ത്യക്ക് നൽകിയ അഭിമുഖത്തിലാണ് ഷെയ്ൻ മനസ്സ് തുറന്നത്. മലയാളികളുടെ നിത്യജീവിതത്തിൽ ഉപയോഗിക്കുന്ന ഒരു വാക്കായി ആ ഡയലോഗ് മാറിയതിൽ താൻ സന്തോഷവാനാണെന്നും ഷെയ്ൻ കൂട്ടിച്ചേർത്തു. ജീവൻ ജോജോയുടെ ഉല്ലാസം, ഡിമൽ ഡെന്നീസിന്റെ വല്യ പെരുന്നാൾ, ശരത്തിന്റെ വെയിൽ എന്നീ ചിത്രങ്ങളാണ് ഷെയ്ന്റെതായി അണിയറയിൽ ഒരുങ്ങുന്നത്.