കട്ട താടിയിൽ മാസ്സ് ലുക്കിൽ എത്തിയിരിക്കുന്ന സുരേഷ് ഗോപിയുടെ പുതിയ ഒരു പെയിന്റിംഗാണ് ഇപ്പോൾ സോഷ്യൽ മീഡിയയിൽ വൈറലായിരിക്കുന്നത്. പുതിയ ലുക്ക് കണ്ടതോടെ പലരും അത് പുതിയ ചിത്രത്തിനായുള്ള ഗെറ്റപ്പാണെന്ന് വാർത്തകൾ പ്രചരിപ്പിക്കുന്നുണ്ട്. അതിനെല്ലാമുള്ള മറുപടിയുമായി സൂപ്പർതാരം തന്നെ മുന്നോട്ട് വന്നിരിക്കുകയാണ്. തന്റെ സോഷ്യൽ മീഡിയ പേജിലാണ് അദ്ദേഹം മറുപടി നൽകിയിരിക്കുന്നത്.
“സോഷ്യൽ മീഡിയയിൽ പങ്ക് വെച്ച് കൊണ്ടിരിക്കുന്ന എന്റെ ഇപ്പോഴത്തെ ലുക്കിലുള്ള ചിത്രങ്ങളോ ഡിസൈനുകളോ ഒന്നും തന്നെ ഷൂട്ടിംഗ് നടന്നുകൊണ്ടിരിക്കുന്ന ചിത്രങ്ങളുടെയോ അന്നൗൺസ് ചെയ്തിരിക്കുന്ന മറ്റേതെങ്കിലും ചിത്രങ്ങളുടേതോ അല്ല. അത്തരം തെറ്റായ വാർത്തകൾ പങ്ക് വെക്കരുതെന്ന് ആരാധകരോടും മാധ്യമങ്ങളോടും മറ്റുള്ളവരോടും ഞാൻ അഭ്യർത്ഥിക്കുന്നു. വ്യക്തമായ അടിസ്ഥാനമില്ലാതെ എന്തെങ്കിലും പോസ്റ്റ് ചെയ്യുന്നതും പങ്ക് വെക്കുന്നതും ഒരിക്കലും ന്യായീകരിക്കാനാവാത്തതാണ്. ഇപ്പോഴുള്ള ഈ ഗെറ്റപ്പ് മാത്യൂസ് തോമസ് സംവിധാനം നിർവഹിക്കുന്ന എന്റെ 250-മത്തെ ചിത്രത്തിന്റെ ഫോട്ടോഷൂട്ട് വരെ മാത്രമേ ഉണ്ടാകൂ. അതിന് പിന്നാലെ രാഹുൽ സംവിധാനം നിർവഹിക്കുന്ന ഒരു ചിത്രം കൂടിയുണ്ട്. ഈ രണ്ടു ചിത്രങ്ങൾക്കും ശേഷം ഷേവ് ചെയ്ത ലുക്കിൽ കാവലിന്റെ ഷൂട്ടിംഗ് പൂർത്തീകരിക്കുകയും ചെയ്യും.”
രാഷ്ട്രീയ രംഗത്ത് നിന്നും അഭിനയ രംഗത്തേക്ക് സുരേഷ് ഗോപിയുടെ ഗംഭീര തിരിച്ചുവരവ് കുറിച്ച വരനെ ആവശ്യമുണ്ട് എന്ന ചിത്രത്തിലെ മേജർ ഉണ്ണികൃഷ്ണൻ എന്ന കഥാപാത്രത്തെ പ്രേക്ഷകർ ഇരുകൈയ്യും നീട്ടിയാണ് സ്വീകരിച്ചത്. നിതിൻ രഞ്ജി പണിക്കർ ഒരുക്കുന്ന കാവൽ എന്ന ചിത്രത്തിന്റെ ഷൂട്ടിംഗ് പുരോഗമിച്ചു കൊണ്ടിരിക്കുമ്പോഴാണ് ലോക്ക് ഡൗൺ വന്നതും എല്ലാ പ്രവർത്തനങ്ങളും നിലച്ചതും. ഷാജി കൈലാസ് സംവിധാന രംഗത്തേക്ക് തിരിച്ചെത്തുന്ന പൃഥ്വിരാജ് നായകനായ കടുവ എന്ന ചിത്രത്തിലും സുരേഷ് ഗോപി അഭിനയിക്കുന്നുണ്ട് എന്ന രീതിയിൽ വാർത്തകൾ പ്രചരിക്കുന്നുണ്ട്.