‘ദൃശ്യം 2’ നു ശേഷം മോഹന്‍ലാലും ജീത്തു ജോസഫും വീണ്ടും ഒന്നിക്കുന്ന ‘ട്വല്‍ത് മാന്‍’ ചിത്രീകരണം തുടങ്ങി. പൂജാ ചടങ്ങുകളോടെയാണ് ഷൂട്ടിങ്ങിന് തുടക്കമായത്. 14 അഭിനേതാക്കള്‍ മാത്രമുള്ള സിനിമയുടെ ചിത്രീകരണം 25 ദിവസം കൊണ്ട് പൂര്‍ത്തിയാക്കാനാണ് ഉദ്ദേശിക്കുന്നത്. സസ്പെന്‍സ് ത്രില്ലറായിരിക്കും ചിത്രം. ഒറ്റദിവസത്തെ സംഭവമാണ് കഥയാകുന്നതെന്ന് സംവിധായകന്‍ ജീത്തു ജോസഫ് പറഞ്ഞിരുന്നു.
പൃഥ്വിരാജ് ചിത്രം ബ്രോ ഡാഡിക്ക് മുമ്പ് ചിത്രീകരണം തുടങ്ങാനിരുന്ന ചിത്രമായിരുന്നു ട്വല്‍ത് മാന്‍. കൊവിഡ് നിയന്ത്രണങ്ങള്‍ മൂലം സര്‍ക്കാര്‍ അനുമതി ഇല്ലാതിരുന്നതു കൊണ്ടാണ് ചിത്രീകരണം വൈകിയത്. കൊവിഡ് പ്രോട്ടോക്കോള്‍ പാലിച്ച് ഇടുക്കി കുളമാവിലെ ഒരു റിസോര്‍ട്ടിലാണ് സിനിമയുടെ ചിത്രീകരണം ആരംഭിക്കുന്നത്. ചിത്രത്തിന്റെ 90 ശതമാനവും ഇവിടെയാകും ചിത്രീകരിക്കുക.
അദിതി രവി, അനുശ്രീ, പ്രിയങ്ക നായര്‍, വീണാ നന്ദകുമാര്‍, ലിയോണ ലിഷോയ്, ശിവദ, സൈജു കുറുപ്പ്, അനു മോഹന്‍ തുടങ്ങിയവരാണ് ചിത്രത്തില്‍ മറ്റു പ്രധാന വേഷങ്ങള്‍ കൈകാര്യം ചെയ്യുന്നത്. നവാഗതനായ കെ.ആര്‍.കൃഷ്ണകുമാറിന്റേതാണ് തിരക്കഥ. സതീഷ് കുറുപ്പ് ആണ് ഛായാഗ്രാഹണം നിര്‍വഹിക്കുന്നത്. പശ്ചാത്തലസംഗീതം അനില്‍ ജോണ്‍സണ്‍. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍ ആണ് ചിത്രം നിര്‍മിക്കുന്നത്.
