റോഷൻ ആൻഡ്രൂസ് ഒരുക്കുന്ന നിവിൻ പോളി ചിത്രമായ കായംകുളം കൊച്ചുണ്ണിയുടെ ട്രെയ്‌ലർ സോഷ്യൽ മീഡിയയിൽ തരംഗമായി മുന്നേറുകയാണ്. കിടിലൻ വിഷ്വൽസും പ്രേക്ഷകനെ ആവേശം കൊള്ളിക്കുന്ന രംഗങ്ങളുമായി എത്തിയ ട്രെയിലർ കണ്ട സന്തോഷം പങ്കു വെച്ചിരിക്കുകയാണ് മോഹൻലാൽ നായകനാകുന്ന ഒടിയന്റെ സംവിധായകൻ വി എ ശ്രീകുമാർ മേനോൻ. കായംകുളം കൊച്ചുണ്ണിയിൽ ഇത്തിക്കര പക്കിയായി ലാലേട്ടനും ഒരു സുപ്രധാന വേഷം കൈകാര്യം ചെയ്യുന്നുണ്ട്. വി എ ശ്രീകുമാർ മേനോന്റെ വാക്കുകളിലൂടെ…
“ഒരു ചെറിയ ഇടവേളക്ക് ശേഷം ആവേശം കൊള്ളിക്കുന്ന മറ്റൊരു ട്രെയ്‌ലർ! തന്റെ വേഷപ്പകർച്ച കൊണ്ടും ഭാവമാറ്റം കൊണ്ടും വേറിട്ട വേഷത്തിൽ നിവിൻ അമ്പരപ്പിച്ചിരിക്കുന്നു. വലിയ സിനിമകൾ ചെയ്യാൻ ആഗ്രഹിക്കുന്നയാളാണ് റോഷൻ ആൻഡ്രൂസ്. അദ്ദേഹത്തിന്റെ ഒരു സ്വപ്നസാക്ഷാത്കാരമാണ് ഈ സിനിമ. റോഷന്റെ മനസ്സിലെ ആ വലിയ സിനിമയുടെ ചില ഫാക്ടറുകൾ ട്രെയ്‌ലറിൽ ഉടനീളം കാണാനായി, അത് തന്നെയാണ് ഈ ചിത്രം കാണാൻ എന്നെ അക്ഷമനാക്കുന്ന പ്രധാന ഘടകം.”
“ഗോകുലം ഗോപാലൻ എന്ന ഗൈഡിങ് ഫോഴ്സ് നൽകിയ ധൈര്യവും പ്രചോദനവും തന്നെയായിരിക്കും പുതിയ പരീക്ഷണങ്ങൾ നടത്താൻ റോഷനെ പ്രോത്സാഹിച്ചിട്ടുണ്ടാവുക എന്ന് ഞാൻ വിശ്വസിക്കുന്നു. എന്നത്തേയും പോലെ ബോബിയുടേയും സഞ്ജയുടേയും പേനയിൽ വിരിഞ്ഞ കഥയുടെ ദൃശ്യാവിഷ്‌ക്കാരം കാണാൻ കാത്തിരിക്കുന്നു, ഒപ്പം കായംകുളം കൊച്ചുണ്ണിയുടേയും ഇത്തിക്കര പക്കിയുടേയും അത്ഭുത പ്രകടനങ്ങൾ കാണാനും.”
