മലയാള സിനിമയിലെ മികച്ച കൂട്ടുകെട്ടുകളിൽ ഒന്നാണ് മോഹൻലാൽ ബ്ലെസ്സി കൂട്ടുകെട്ട്, മമ്മൂട്ടിയെ നായകനാക്കി ചെയ്ത കാഴ്ച എന്ന സിനിമയിൽ കൂടിയാണ് ബ്ലെസ്സി തന്റെ സിനിമ ജീവിതം ആരംഭിക്കുന്നത്, അതിനു ശേഷം മോഹൻലാലിനെ നായകനാക്കി ബ്ലെസി ചെയ്ത മൂന്നു ചിത്രങ്ങളും ഗംഭീര വിജയം ആയിരുന്നു, മോഹലാലിനെ നായകനാക്കി ബ്ലസ്സി ചെയ്ത തന്മത്ര, ഭ്രമരം, പ്രണയം എന്നീ മൂന്നു ചിത്രങ്ങൾ മലയാളത്തിലെ ക്ലാസ്സിക്കുകളുടെ ലിസ്റ്റിൽ പെടുത്താവുന്ന ചിത്രങ്ങളാണ്. പ്രേക്ഷകരും നിരൂപകരും ഒരുപോലെ സ്വീകരിച്ച ഈ ചിത്രങ്ങൾക്ക് ശേഷം ബ്ലെസ്സി ഒരുക്കിയ ലോക റെക്കോർഡ് നേടിയ ഡോക്കുമെന്ററിയിലും ശബ്ദ സാന്നിധ്യമായി മോഹൻലാൽ എത്തി.
ഇപ്പോൾ പുറത്ത് വരുന്ന വാർത്ത പ്രണയം എന്ന സിനിമക്ക് ശേഷം മോഹൻലാലും ബ്ലസ്സിയും വീണ്ടും ഒന്നിക്കുന്നു എന്നാണ്, മോഹൻലാൽ- ബ്ലെസ്സി ടീമിന്റെ ഈ ചിത്രം നിർമ്മിക്കാൻ പോകുന്ന രാജു മല്യത് തന്നെയാണ് ഈ വിവരം പുറത്തു പറഞ്ഞത്. മോഹൻലാൽ- പദ്മരാജൻ ടീമിന്റെ ക്ലാസിക് ആയ നമ്മുക്ക് പാർക്കാൻ മുന്തിരി തോപ്പുകൾ, മോഹൻലാൽ- ബ്ലെസ്സി ടീമിന്റെ ഭ്രമരം എന്നീ ചിത്രങ്ങൾ നിർമ്മിച്ചതും രാഗം മൂവീസിന്റെ ബാനറിൽ രാജു മല്യത്താണ്. ഈ വര്ഷം പുറത്തിറങ്ങിയ ടൊവിനോ ചിത്രം ഫോറൻസിക് നിർമ്മിച്ചത് രാജു മല്യയാണ്, ഇപ്പോൾ ചിത്രത്തിന്റെ റീമേക്ക് അവകാശങ്ങൾ വിറ്റ് പോയിരിക്കുകയാണ്, അതിനെ കുറിച്ച് മാധ്യമങ്ങളോട് സംസാരിക്കുന്നതിനിടെയാണ് അദ്ദേഹം പുതിയ ചിത്രത്തെ കുറിച്ച് പറഞ്ഞത്.
ബ്ലെസ്സിയുടെ പൃഥ്വിരാജ് ചിത്രമായ ആടു ജീവിതത്തിന്റെ അവസാന ഷെഡ്യൂൾ ഇപ്പോഴും ബാക്കിയാണ്. ചിത്രം പൂർത്തിയാക്കിയതിന് ശേഷമാണോ പുതിയ ചിത്രം തുടങ്ങുന്നത് എന്ന കാര്യത്തിൽ യാതൊരു വ്യക്തതയും വന്നിട്ടില്ല. ബ്ളസി മോഹൻലാൽ കൂട്ടുകെട്ടിൽ ഒരുങ്ങുന്ന പുത്തൻ ചിത്രം ഒഫീഷ്യൽ ആയി പ്രഖ്യാപിക്കുന്നതും കാത്തിരിക്കുകയാണ് മോഹൻലാൽ ആരാധകരും മലയാള സിനിമ ലോകവും.
